---
title: "O Steer Her up an’ Haud Her Gaun"
author: "Robert Burns"
form: "Poem"
year: "1795"
location: "Dumfries"
source: "Project Gutenberg #1279 — Poems and Songs of Robert Burns"
source_url: "https://www.gutenberg.org/cache/epub/1279/pg1279.txt"
canonical_url: "https://robert-burns.com/poems/o-steer-her-up-an-haud-her-gaun/"
---

# O Steer Her up an’ Haud Her Gaun

## Poem
O steer her up, an’ haud her gaun,  
Her mither’s at the mill, jo;  
An’ gin she winna tak a man,  
E’en let her tak her will, jo.  
First shore her wi’ a gentle kiss,  
And ca’ anither gill, jo;  
An’ gin she tak the thing amiss,  
E’en let her flyte her fill, jo.

O steer her up, an’ be na blate,  
An’ gin she tak it ill, jo,  
Then leave the lassie till her fate,  
And time nae langer spill, jo:  
Ne’er break your heart for ae rebute,  
But think upon it still, jo:  
That gin the lassie winna do’t,  
Ye’ll find anither will, jo.

---

Source: [Project Gutenberg #1279 — Poems and Songs of Robert Burns](https://www.gutenberg.org/cache/epub/1279/pg1279.txt)  
Canonical HTML: https://robert-burns.com/poems/o-steer-her-up-an-haud-her-gaun/