---
title: "O Let Me in Thes Ae Night"
author: "Robert Burns"
form: "Poem"
year: "1795"
location: "Dumfries"
source: "Project Gutenberg #1279 — Poems and Songs of Robert Burns"
source_url: "https://www.gutenberg.org/cache/epub/1279/pg1279.txt"
canonical_url: "https://robert-burns.com/poems/o-let-me-in-thes-ae-night/"
---

# O Let Me in Thes Ae Night

## Poem
O Lassie, are ye sleepin yet,  
Or are ye waukin, I wad wit?  
For Love has bound me hand an’ fit,  
And I would fain be in, jo.

*Chorus*  
O let me in this ae night,  
This ae, ae, ae night;  
O let me in this ae night,  
I’ll no come back again, jo!

O hear’st thou not the wind an’ weet?  
Nae star blinks thro’ the driving sleet;  
Tak pity on my weary feet,  
And shield me frae the rain, jo.

*Chorus*  
O let me in this ae night,  
This ae, ae, ae night;  
O let me in this ae night,  
I’ll no come back again, jo!

The bitter blast that round me blaws,  
Unheeded howls, unheeded fa’s;  
The cauldness o’ thy heart’s the cause  
Of a’ my care and pine, jo.

*Chorus*  
O let me in this ae night,  
This ae, ae, ae night;  
O let me in this ae night,  
I’ll no come back again, jo!

---

Source: [Project Gutenberg #1279 — Poems and Songs of Robert Burns](https://www.gutenberg.org/cache/epub/1279/pg1279.txt)  
Canonical HTML: https://robert-burns.com/poems/o-let-me-in-thes-ae-night/