---
title: "I’m O’er Young to Marry yet"
author: "Robert Burns"
form: "Poem"
year: "1788"
location: "Mossgiel"
source: "Project Gutenberg #1279 — Poems and Songs of Robert Burns"
source_url: "https://www.gutenberg.org/cache/epub/1279/pg1279.txt"
canonical_url: "https://robert-burns.com/poems/im-oer-young-to-marry-yet/"
---

# I’m O’er Young to Marry yet

## Poem
*Chorus*  
I’m o’er young, I’m o’er young,  
I’m o’er young to marry yet;  
I’m o’er young, ’twad be a sin  
To tak me frae my mammy yet.

I am my mammny’s ae bairn,  
Wi’ unco folk I weary, sir;  
And lying in a man’s bed,  
I’m fley’d it mak me eerie, sir.

*Chorus*  
I’m o’er young, I’m o’er young,  
I’m o’er young to marry yet;  
I’m o’er young, ’twad be a sin  
To tak me frae my mammy yet.

My mammie coft me a new gown,  
The kirk maun hae the gracing o’t;  
Were I to lie wi’ you, kind Sir,  
I’m feared ye’d spoil the lacing o’t.

*Chorus*  
I’m o’er young, I’m o’er young,  
I’m o’er young to marry yet;  
I’m o’er young, ’twad be a sin  
To tak me frae my mammy yet.

Hallowmass is come and gane,  
The nights are lang in winter, sir,  
And you an’ I in ae bed,  
In trowth, I dare na venture, sir.

*Chorus*  
I’m o’er young, I’m o’er young,  
I’m o’er young to marry yet;  
I’m o’er young, ’twad be a sin  
To tak me frae my mammy yet.

Fu’ loud an’ shill the frosty wind  
Blaws thro’ the leafless timmer, sir;  
But if ye come this gate again;  
I’ll aulder be gin simmer, sir.

*Chorus*  
I’m o’er young, I’m o’er young,  
I’m o’er young to marry yet;  
I’m o’er young, ’twad be a sin  
To tak me frae my mammy yet.

---

Source: [Project Gutenberg #1279 — Poems and Songs of Robert Burns](https://www.gutenberg.org/cache/epub/1279/pg1279.txt)  
Canonical HTML: https://robert-burns.com/poems/im-oer-young-to-marry-yet/