---
title: "Here’s to Thy Health"
author: "Robert Burns"
form: "Song"
year: "1780"
tune: "Laggan Burn"
location: "Lochlea"
source: "Project Gutenberg #1279 — Poems and Songs of Robert Burns"
source_url: "https://www.gutenberg.org/cache/epub/1279/pg1279.txt"
canonical_url: "https://robert-burns.com/poems/heres-to-thy-health/"
---

# Here’s to Thy Health

## Song
Here’s to thy health, my bonie lass,  
Gude nicht and joy be wi’ thee;  
I’ll come nae mair to thy bower-door,  
To tell thee that I lo’e thee.  
O dinna think, my pretty pink,  
But I can live without thee:  
I vow and swear I dinna care,  
How lang ye look about ye.

Thou’rt aye sae free informing me,  
Thou hast nae mind to marry;  
I’ll be as free informing thee,  
Nae time hae I to tarry:  
I ken thy frien’s try ilka means  
Frae wedlock to delay thee;  
Depending on some higher chance,  
But fortune may betray thee.

I ken they scorn my low estate,  
But that does never grieve me;  
For I’m as free as any he;  
Sma’ siller will relieve me.  
I’ll count my health my greatest wealth,  
Sae lang as I’ll enjoy it;  
I’ll fear nae scant, I’ll bode nae want,  
As lang’s I get employment.

But far off fowls hae feathers fair,  
And, aye until ye try them,  
Tho’ they seem fair, still have a care;  
They may prove waur than I am.  
But at twal’ at night, when the moon shines bright,  
My dear, I’ll come and see thee;  
For the man that loves his mistress weel,  
Nae travel makes him weary.

---

Source: [Project Gutenberg #1279 — Poems and Songs of Robert Burns](https://www.gutenberg.org/cache/epub/1279/pg1279.txt)  
Canonical HTML: https://robert-burns.com/poems/heres-to-thy-health/