---
title: "Awa’ Whigs, Awa’"
author: "Robert Burns"
form: "Poem"
year: "1789"
location: "Ellisland"
source: "Project Gutenberg #1279 — Poems and Songs of Robert Burns"
source_url: "https://www.gutenberg.org/cache/epub/1279/pg1279.txt"
canonical_url: "https://robert-burns.com/poems/awa-whigs-awa/"
---

# Awa’ Whigs, Awa’

## Poem
*Chorus*  
Awa’ Whigs, awa’!  
Awa’ Whigs, awa’!  
Ye’re but a pack o’ traitor louns,  
Ye’ll do nae gude at a’.

Our thrissles flourish’d fresh and fair,  
And bonie bloom’d our roses;  
But Whigs cam’ like a frost in June,  
An’ wither’d a’ our posies.

*Chorus*  
Awa’ Whigs, awa’!  
Awa’ Whigs, awa’!  
Ye’re but a pack o’ traitor louns,  
Ye’ll do nae gude at a’.

Our ancient crown’s fa’en in the dust—  
Deil blin’ them wi’ the stoure o’t!  
An’ write their names in his black beuk,  
Wha gae the Whigs the power o’t.

*Chorus*  
Awa’ Whigs, awa’!  
Awa’ Whigs, awa’!  
Ye’re but a pack o’ traitor louns,  
Ye’ll do nae gude at a’.

Our sad decay in church and state  
Surpasses my descriving:  
The Whigs cam’ o’er us for a curse,  
An’ we hae done wi’ thriving.

*Chorus*  
Awa’ Whigs, awa’!  
Awa’ Whigs, awa’!  
Ye’re but a pack o’ traitor louns,  
Ye’ll do nae gude at a’.

Grim vengeance lang has taen a nap,  
But we may see him wauken:  
Gude help the day when royal heads  
Are hunted like a maukin!

*Chorus*  
Awa’ Whigs, awa’!  
Awa’ Whigs, awa’!  
Ye’re but a pack o’ traitor louns,  
Ye’ll do nae gude at a’.

---

Source: [Project Gutenberg #1279 — Poems and Songs of Robert Burns](https://www.gutenberg.org/cache/epub/1279/pg1279.txt)  
Canonical HTML: https://robert-burns.com/poems/awa-whigs-awa/