---
title: "Auld Lang Syne"
author: "Robert Burns"
form: "Song"
year: "1788"
location: "Mossgiel"
source: "Project Gutenberg #1279 — Poems and Songs of Robert Burns"
source_url: "https://www.gutenberg.org/cache/epub/1279/pg1279.txt"
canonical_url: "https://robert-burns.com/poems/auld-lang-syne/"
---

# Auld Lang Syne

## Song
Should auld acquaintance be forgot,  
And never brought to mind?  
Should auld acquaintance be forgot,  
And auld lang syne!

*Chorus*  
For auld lang syne, my dear,  
For auld lang syne.  
We’ll tak a cup o’ kindness yet,  
For auld lang syne.

And surely ye’ll be your pint stowp!  
And surely I’ll be mine!  
And we’ll tak a cup o’kindness yet,  
For auld lang syne.

*Chorus*  
For auld lang syne, my dear,  
For auld lang syne.  
We’ll tak a cup o’ kindness yet,  
For auld lang syne.

We twa hae run about the braes,  
And pou’d the gowans fine;  
But we’ve wander’d mony a weary fit,  
Sin’ auld lang syne.

*Chorus*  
For auld lang syne, my dear,  
For auld lang syne.  
We’ll tak a cup o’ kindness yet,  
For auld lang syne.

We twa hae paidl’d in the burn,  
Frae morning sun till dine;  
But seas between us braid hae roar’d  
Sin’ auld lang syne.

*Chorus*  
For auld lang syne, my dear,  
For auld lang syne.  
We’ll tak a cup o’ kindness yet,  
For auld lang syne.

And there’s a hand, my trusty fere!  
And gie’s a hand o’ thine!  
And we’ll tak a right gude-willie waught,  
For auld lang syne.

*Chorus*  
For auld lang syne, my dear,  
For auld lang syne.  
We’ll tak a cup o’ kindness yet,  
For auld lang syne.

---

Source: [Project Gutenberg #1279 — Poems and Songs of Robert Burns](https://www.gutenberg.org/cache/epub/1279/pg1279.txt)  
Canonical HTML: https://robert-burns.com/poems/auld-lang-syne/